કાર્ટૂનિસ્ટ હર્જ દ્વારા નિર્મિત રિપોર્ટર ટિનટિન આમ તો મૂળે કોમિક કેરેક્ટર છે. ૧૯૨૯માં સૌપ્રથમ વખત કોમિક બુકરૂપે તેને લોન્ચ કરવામાં આવ્યું હતું. જોકે, પછીથી તો તે ખૂબ જ લોકપ્રિય બન્યું હતું અને ટેલિવિઝન શ્રેણી સ્વરૂપે પણ જોવા મળ્યું છે.
(ટિનટિન કેરેક્ટરનું સર્જન કરનારા કાર્ટૂનિસ્ટ જ્યોર્જ પોસ્પર રેમી, જે હેર્જ નામથી ઓળખાતા હતા)
દૂબળું-પાતળું શરીર અને વાંકડિયા ગુચ્છાદાર વાળ તેની આગવી ઓળખ છે. તે એકદમ સાહસી રિપોર્ટર છે. દુનિયાભરની રઝળપાટ કરીને તે કશુંક નવું શોધી લાવે છે. તે દેખાવમાં પરાણે વહાલો લાગે એવો છે.
હંમેશાં સાથે રહેતા ડોગી સ્નોવી અને સતત નશામાં રહેતા કેપ્ટન હૈડોક સાથે મળીને તે દુનિયાની બૂરાઈઓ સામે લડત આપતો રહે છે.
મૂળે બેલ્જિયમના આ કેરેક્ટરની લોકચાહના દિવસે દિવસે વધતી જ રહી છે.
૮૦ વર્ષ પહેલાં નિર્માણ પામેલું આ પાત્ર આજે જગતની ૫૦ જેટલી ભાષાઓમાં પ્રસારિત થાય છે. એટલું જ નહીં એક અંદાજ પ્રમાણે દર વર્ષે ટિનટિનની ૩૦ લાખ કરતાં પણ વધારે કોમિક બુક્સ દુનિયાભરના બજારમાં વેચાય છે.



મહાન દિગ્દર્શક સ્ટિવન સ્પીલબર્ગે લોર્ડ ઓફ ધ રિંગના નિર્દેશક પીટર જેક્સન સાથે મળીને ગત વર્ષ 'ધ એડવેન્ચર ઓફ ટિનટિન સિક્રેટ ઓફ ધ યુનિકોર્ન' નામની થ્રીડી ફિલ્મ બનાવી હતી, જે ખૂબ જ લોકપ્રિય રહી હતી.

                                                     
                                                     ગારફિલ્ડના સર્જક જિમ ડેવિસ

ડેવિસને એવું કાર્ટૂન કેરેક્ટર ક્રિએટ કરવું હતું કે જેની સાથે સામાન્ય માણસ જલદીથી જોડાઈ શકે અને આ માટે તેમણે આ બિલાડાનું સર્જન કર્યું. પીળા રંગનું આ કાર્ટૂન કેરેક્ટર સમગ્ર વિશ્વની પ્રાદેશિક ભાષાઓમાં પોપ્યુલર રહ્યું છે.૧૯૭૮માં ગારફિલ્ડને એક કોમિક સ્ટ્રિપમાં સમાવવામાં આવ્યું. કોમિક સ્વરૂપે લોકપ્રિય બન્યા પછી ૧૯૮૨માં ગારફિલ્ડ પર 'હિઅર કમ્સ ગારફિલ્ડ' નામની એનિમેટેડ શ્રેણી પણ બનાવાઈ હતી. શરૂઆતમાં ગારફિલ્ડને કોઈ પસંદ કરતું નહોતું, પરંતુ ધીમે ધીમે તેનો અંદાજ અને તેની ખૂબીઓ લોકપ્રિય થવા લાગી.
ગારફિલ્ડની સેન્સ ઓફ હ્યુમર જબરદસ્ત છે. તે પોતાની હાજરજવાબીથી બધાની બોલતી બંધ કરી દે છે. આ અંદાજથી જ તે અન્ય કાર્ટૂન કેરેક્ટરથી અલગ તરી આવે છે. તે હંમેશાં પોતાના માલિકની સાથે ટેબલ પર ખાતાં-પીતાં નજરે ચડે છે. ખાવાનો અને ઊંઘવાનો તેને જબરો શોખ છે.
તેના જીવનનો ઉદ્દેશ ખરેખર તો આરામ કરવાનો અને ખાવાનો જ હોય છે. તેને અવનવી વાનગી આરોગવી હોય છે અને એટલે જ તે માલિક સાથે સારાસારી પણ રાખે છે. જોકે એ સિવાય તે પોતાના માલિકની હાંસી ઉડાવતો રહે છે. ગારફિલ્ડ પર ફિલ્મો પણ બની છે.