રં ગ બદલી શકનાર અનોખા સજીવ તરીકે કાચિંડાને આપણે ઓળખીએ છીએ. તાજેતરમાં કાચિંડાની એક નોખી ટચૂકડી પ્રજાતિ મળી આવી છે. અચરજ પમાડે એવી વાત તો એ છે કે આ કાચિંડા આપણી આંગળીના નખ જેટલા નાનકડા હોય છે.

માચિસની સળીના ઉપરના ભાગમાં સમાઈ જાય એટલા ટબૂકડા આ સજીવો માડાગાસ્કરમાંથી મળી આવ્યા છે. શોધકર્તાઓએ તેનું નામ બ્રુકેશિયા માઇક્રા પાડયું છે. તેની લંબાઈ માંડ ૨૯ મિલીમીટર જેટલી છે.

જર્મનીના વિજ્ઞાનિકોએ માડાગાસ્કરના ટાપુ પરથી આ નાનકડા કાચિંડાઓને ખોળી કાઢયા છે. એકાદ કિલોમીટરના વિસ્તારમાં વિચરતા આ સજીવો દિવસ દરમિયાન ભાગ્યે જ જોઈ શકાય છે.

દિવસે પાંદડાંઓની વચ્ચે ભરાઈ રહેલા માઇક્રો કાચિંડા રાત્રે ડાળીઓ પર નીકળે ત્યારે જ તેને જોઈ શકાય છે. સંશોધક ટીમના ડો. ફેંક ગ્લોએ તેના ટચૂકડા કદનું કારણ જણાવતાં કહ્યું હતું કે 'ટાપુઓ પર વર્ષોથી આ સજીવો વસવાટ કરતા હશે અને સમયાંતરે વિવિધ પ્રાકૃતિક અસરો થવાથી તેનો આવો આકાર થયો હશે.' કારણ તો જે હોય તે, પણ આ સજીવો છે બહુ મજાના!  

(સંદેશની પૂર્તિમાં પ્રકાશિત)